admin

Се наближува новото 51. издание на фестивалот на народни инструменти и песни „Пеце Атанасовски“. Заедно ќе уживаме во звуците на гајдата, кавалот, на кемането, зурлата тапанот, ќе уживаме во мајсторијата на нашите изведувачи од сите краишта на Македонија. А ќе имаме и гости.Годинава имаме подновено руво. Датумот е многу поблиску отколку досега.Воспоставуваме нова, или подновена традиција.ОД ГОДИНАВА ФЕСТИВАЛОТ СЕ ВРАЌА НА СВОИТЕ КОРЕНИ НА ОДРЖУВАЊЕ. ЌЕ СЕ ОДРЖИ НА 31 МАЈ И НА 1 ЈУНИ 2025, В САБОТА И В НЕДЕЛА ВО ДОЛНЕНИ.НА ИЗВОРОТ НА СВОИТЕ ТРАДИЦИИ!Семинарот за изучување на народните инструменти и песни ќе се одржува од 26 до 30 мај во Прилеп. Подготовките течат забрзано.Наскоро, ќе Ве потсетиме на убавиот изворен мелос.

Гран при за КУД „Јане Сандански“, а Гајдата на Пеце за Здравко Андонов од Ињево, Радовишко на фестивалот „Пеце Атанасовски“ Искусниот гајдаџија Здравко Андонов од село Ињево, Радовишко е годинашниов добитник на Гајдата на Пеце која ја доделува општина Долнени како најдобар изведувач, а Културно-уметничкото друштво „Јане Сандански“ од Неготино е добитник на Гран при наградата на 50. јубилеен Фестивал на народни инструменти и песни „Пеце Атанасовски“ кој се одржуваше во Прилеп и на Рудина, Долнени.Фестивалот додели и 6 награди-гајдарки, 10 статуетки и 50 плакети на истакнати учесници. Жирито кое одлучуваше го сочинуваат истакнати фолклористи: професор д-р Родна Величковска, професор д-р Горанчо Ангелов и доцент д-р Стојанче Костов. На Фестивалот учествуваа преку 250 изведувачи на изворниот мелос од сите краишта на Македонија. По 13-ти пат се одржа Семинарот за изучување на народните инструменти и песни, а беа промовирани и зборникот на научни трудови „Фолклорот во минатото и денес“, како и монографијата за 50-годишниот јубилеј на Фестивалот „Непресушен извор-за навек“. Фестивалот во петокот го отвори дефилето на 50 гајдаџии во центарот на Прилеп, а втората фестивалска вечер се одржа синоќа на Рудина, Долнени.

Фестивалот „Пеце Атанасовски и КЕЦ „Небрегово“ потпишаа декларација за соработкаВо рамките на 50. Фестивал на народни инструменти и песни „Пеце Атанасовски“ што се одржува во Прилеп и во Долнени, денеска во Спомен-куќата на Фестивалот во Долнени беше потпишана декларација за соработка насловена „Зборот на Конески, Гајдата на Пеце“. Декларацијата ја потпишаа Фестивалот и културниот и информативен центар „Небрегово“ како и манифестацијата „Зборот на Конески“. Декларацијата ја потпишаа претседателот на Фестивалот „Пеце Атанасовски“, Горан Василески, и претседателот на КЕЦ „Небрегово“, Живко Цветкоски. Според секретарот на КЕЦ „Небрегово, Атанас Конески ова е значаен културен миг за две личности кои ја одбележале културната историја на Македонија.-Великанот Блаже Конески и уметникот со универзални вредности, Пеце Атанасовски ги одбележаа културната историја, националниот самобит, постоењето и продолжувањето на она што го направиле нивните претходници, нашите предци. Ние сме нивни почитувачи и продолжувачи и за нас значат инспирација за далекусежни постигнувања на културен, национален, музички и духовен план, рече Атанас Конески. Претседателот на Фестивалот „Пеце Атанасовски, Горан Василескиги нагласи честа, но и одговорноста за културната соработка на манифестациите.-Огромна е честа што можеме овие два великани од Прилепско, Блаже Конески и Пеце Атанасовски, на некој начин да ги споиме со оваа декларација, нивните дела и нивното значење, рече Василески.Декларацијата во пет точки ја прецизира соработката, меѓу кои и да ги чуваат и да ги продолжуваат македонскиот збор и македонското народно богатство, врежани во нашиот идентитет и континуитет и да ги едуцираат идните генерации. Декларацијата ќе биде доставена до надлежните институции,Владата, Министрството за култура и туризам, министерството за локална самоуправа, до ЗЕЛС, локалните самоуправи на Прилеп и Долнени и ќе се бара поддршка за активностите.

Со дефиле на 50 гајдаџии од цела Македонија на возраст од 5 до 95 години, синоќа на летната сцена на плоштадот Александрија во Прилеп беше отворен 50-тиот, јубилеен Фестивал на народни инструменти и песни „Пеце Атанасовски“. Преку 250 изведувачи на изворниот мелос во првата и во втората фестивалска вечер, во Прилеп и на Рудина, Долнени ја презентираат љубовта спрема фолклорните традиции. Речиси 80-годишниот Здравко Андонов од Ињево, Радовишко од 16-годишна возраст е со гајдата.-Многу сакам да свирам на гајда. Сум учествувал на многу фестивали, сум гостувал и во Англија. Овде на Фестивалот „Пеце Атанасовски“ многу ми е убаво. Се дружиме, разменуваме мислења за изворниот мелос. И така треба да биде, рече гајдаџијата Здравко Андонов. Никола Стојов од Оризари, Кочанско е млад гајдаџија, ама љубовта спрема изворниот мелос, смета, се наследува. -Ги гледаме, ги слушаме повозрасните и сакаме да свириме, да ги негуваме и чуваме традициите, вели Стојов. На првата фестивалска вечер во Прилеп настапија 16 групи изведувачи од цела Македонија.-Фестивалот е еден од ретките фолклорни фестивали кој може да се пофали со голем јубилеј. Ги негуваме фолклорните традции, а го имаме и Семинарот за изучување на народните инструменти и песни на кој учат млади веќе 13 години. Тоа е наша голема радост и сериозно сме посветени на негувањето, зачувувањето и пренесувањето на помладите на богатиот изворен мелос, рече Горан Василески, претседател на Фестивалот. Трајче Малинов, наставник по традиционални инструменти во основното училиште „Стефан Гајдов“ од Велес е радосен што со младите учествува првпат на Фестивалот. Фолклорот, смета е идентитет на еден народ. -Се враќа „во мода“ она традиционалното, нашето старото, автохтоното, што мораме да го негуваме, бидејќи културата е нешто основно за да опстане една нација. Тоа е идентитетот на еден народ, рече Малинов. Фестивалот ги промовираше петтиот зборник на научни трудови „Фолклорот во минатото и денес“ како и монографијата „непресушен извор, за навек“ за 50-годишниот јубилеј.На првата фестивалска вечер, настапи и вокалноинструменталниот состав при националниот ансамбл „Танец“. Денеска во 11 часот во Спомен-куќата во Долнени ќе биде потпишан меморандум за соработка со културноинформативниот центар „Небрегово“ и со манифестацијата „Зборникот на Конески“, а од 19 часот е втората фестивалска вечер. Ќе бидат доделени Гран при наградата за најдобар изведувач и Гајдата на Пеце што ја доделува општина Долнени за најдобриот гајдаџија на Фестивалот.

Со дефиле во центарот на Прилеп на 50 гајдаџии од цела Македонија утревечер ќе започне 50-тото, јубилејно издание на Фестивалот на народни инструменти и песни „Пеце Атанасовски“. Во двете фестивалски вечери, утревечер од 19 часот на летната сцена од плоштадот Александрија во Прилеп, а в сабота на Рудина Долнени, ќе настапат околу 250 изведувачи на изворниот мелос, беше соопштено на денешната прес-конференција во Прилеп. Во рамките на фестивалот веќе се одржува Семинарот за изучување на народните инструменти и песни во Ученичкиот дом „Орде Чопела. Учествуваат 12 млади, вљубеници во фолклорните традиции, а предавачи се професор д-р Родна Величковска, уметнички директор на Фестивалот, професор д-р Горанчо Ангелов од музичката академија при Универзитетот „Гоце Делчев“ од Штип, доцент д-р Стојанче Ангелов и м-р Горан Василески, претседател на Фестивалот.-Фестивалот одбележува голем јубилеј, пет децении постоење и ја исполнува задачата за зачувување, негување и пренесување на помладите генерации на богатиот изворен мелос. Изведувачи на народни инструменти и песни има многу во Македонија, од најмлади од 5 годишна возраст, па до 95 години и радост е да се знае дека фолклорната традиција се негува, рече Родна Величковска, уметнички директор на Фестивалот. За јубилејното издание се бројни фестивалски настани.-Освен семинарот, застапена е и научната мисла. Еминентни научни дејци од фолклористиката и годинава на научниот симпозиум, утре од 11 часот, ќе ги претстават најновите истражувања, објавени во Зборникот „Фолклорот во минатото и денес“. Фестивалот ќе ја промовира и монографијата за јубилејот: „Непресушен извор – за навек“. Многу е значајно што в сабота во Спомен-куќата на фестивалот во Долнени ќе биде потпишан Меморандум за соработка со Културно информативниот центар „Небрегово“ и со манифестацијата „Зборникот на Конески“ со што на повисоко ниво се истакнува значењето на големите дејци од Прилепскиот регион: великанот Блаже Конески како и народниот уметник со универзални вредности кој богатото културно наследство го има претставено низ светот, Пеце Атанасовски чие име го носи Фестивалот, рече Горан Василески, претседател на Фестивалот за народни инструменти и песни „Пеце Атанасовски“. За доцент д-р Стојанче Костов е битно што Фестивалот не го загуби континуитетот ниту во пандемиските години, а професор д-р Горанчо Ангелов смета дека последните години е зголемен интересот на младите да го иузучуваат богатиот изворен мелос. -Значајно е што се зголеми интересот кај младите и да свират и да опеат, а треба поддршка и за „мајсторите“ кои изработуваат народни инструменти. Во моментов се бројат на прсти, околу 8 се во земјава. Најмладиот има 24, а највозрасниот околу 70 години. Освен тоа институционалната поддршка е пресудна за зачувување на богатото фолклорно наследство, рече на прес-конференцијата Ангелов.За 50 години на Фестивалот учествувале преку 15 000 изведувачи на изворен мелос, имало и гости од сите краишта на светот, а во 13 години на одржувањето на Семинарот, изучувале околу 150 вљубеници на фолклорните традиции. По повод јубилејот, Фестивалот ќе додели 10 статуетки и 50 благодарници на поединци и институции кои го помогнале растежот на оваа национална манифестација. Генерален покровител е Министерството за култура, а покровители се локалните самоуправи на Прилеп и на Долнени.